Ahong, kaubanan nakigtagbo ni Isko

CEBU, Philippines — Nakigtagbo ang mga opisyal sa kagamhanan sa Dakbayan sa Lapu-Lapu kang Manila City Mayor Francisco “Isko” Moreno Domagoso.

Sila si Lapu-Lapu City Mayor Junard “Ahong” Chan, Bise Mayor Celedonio Sitoy ug mga konsehal gikuyogan sa pangulo sa Presidential Legislative Liaison Office, Secretary Adelino Sitoy.

Tumong nila ang pagpangandam sa ika-500 ka tuig nga pagsaulog sa Kristiyanismo sa nasud diin ang Sugbo, Manila ug Dakbayan sa Davao maoy mag-una sa pagpangandam sa pagahimoon nga kulturanhong kalihukan.

Sa maong kasaulogan maoy nasentro ang Isla sa Mactan diin nahitabo ang dakung away tali nilang Datu Lapu-Lapu ug Ferdinand Magellan kinsa napatay sa maong away 500 na ka tuig nga nakalabay. Gisugdan na karon sa kagamhanan sa maong dakbayan ang pagpangandam sa pagahimoon nga mga kalihukan nga maoy hinungdan sa pag-umol sa quincentennial committee.

Si Chan niingon nga nalakbit usab nila ni Moreno ang panagbayloay sa mga pamaagi sa pagsulbad sa mga suliran nga naglakip sa pagtinabangay sa kabarangayan, pagpanglimpyo sa Mactan Channel, Manila Bay ug kabaybayonan. GMR (BANAT NEWS)