Palma niawhag 500 ka tuig sa Kristiyanismo iampo

CEBU, Philippines — Pag-ampo kang Santa Teresa de Avila maoy gipahimug-atan sa mga opisyal sa Dakbayan sa Talisay ug lakip ni Archbishop Jose Palma atol sa pontifical mass atol sa kapistahan sa dakbayan.

Matud ni Palma nga ang pag-ampo maoy angay tamdanan sa tawo sa iyang kinabuhi aron mas mapaduol siya sa Ginoo.

Dugang ni Palma nga kung ang tawo puno sa pag-ampo makadala kini ug kaayuhan ilabi na sa iyang paglawig padulong sa 500 ka tuig sa Kristiyanismo sa nasud.

Ang Arsobispo nitug-an nga diha sa pag-ampo makita ang gugma, diin dili angayan mabalaka ang tawo tungod kay anaa si Hesus ug Maria nga nag-uban kanunay.

Si Kongresista Eduardo Gullas sa iyang bahin nihangyo sa mga Talisaynon nga mag-ampo dili lang panahon sa pista ug kung adunay pangayoon kung dili mangadye alang sa pagpasalamat sa tanan grasya nga nadawat.

Malaumon siya nga ang mga Talisaynon dili makalimot ang ilang pamilya sa pag-ampo sa rosaryo ug dili lang magpaduol sa Ginoo kung panahon lang sa pista kung dili sa tanan nga panahon.

Si Mayor Gerard Anthony “Samsam” Gullas mapasalamaton sa tanang grasya ug malaumon nga tanan mga Talisaynon modangop una sa simbahan agi og pagpasalamat sa patrona sa dakbayan una moadto sa nagkadaiyang kalingawan. GMR (BANAT NEWS)