Kamatayon sa bata padayong giimbestigar

CEBU, Philippines — Nipadala na og imbestigador ang Commission on Human Rights (CHR)-7 kinsa maoy moimbestigar kabahin sa  10-anyos nga batang lalaki kinsa napalgang patay diha sulod sa sakyanan sa usa ka bombero sa Lungsod sa Balamban.

Matud sa chief investigator sa CHR-7 Leo Villarino nga bisan pa man og ang ginikanan sa bata dili interesado nga mopasaka og kaso apan magpadayon gihapon ang imbestigasyon nga buhaton sa ilang buhatan. Gibutyag ni Villarino nga usa sa tahas nga gihatag nila sa ilang imbestigador nga kombinsihon ang pamilya nga ipaubos ang biktima sa autopsy aron pagdeterminar sa hinungdan sa kamatayon niini. “We have to remember, basta medico legal case like this one, dili man ni namatay ang bata sa natural cause, namatay man ni suspected medico legal case man gud ni, so the consent to have an autopsy does not actually rightfully belong to the family it is with the prosecutor, dapat ang prosecutor maoy mohatag og “go signal” or dili ba and if moingon pod ang prosecutor nga dili na necessary ang autopsy he has to explain nganong dili man”, pasabot ni Villarino.

Laing tumong usab sa mga imbestigador mao nga maestorya ang kapolisan sa lungsod ug maimbitar ang bombero nga maoy tag-iya sa sakyanan nga mopatim-aw sa buhatan sa CHR-7 aron makahatag kini sa iyang habig. “We have to give due process sa atong gihimong mga imbestigasyon like if you are a respondent of the case or you are a suspect sa atong kapolisan tagaan gyud og oportunidad para i-explain nimo unsay nahitabo it will work your best interest nga mo-appear ka sa investigation and tell us your side of the story. (/BDB)(BANATNEWS)