Manhunt operation batok sa Narco-cop sa Cordova gilusad
CEBU, Philippines — Gipalapdan pa karon ang manhunt operation batok sa kanhi polis nga giingong usa na karon ka drug pusher nga nakaeskapo sa buy bust operation sa kapolisan sa Barangay Bangbang, Lungsod sa Cordova sa miaging semana.
Sa maong operasyon, napatay ang duha ka mga kakunsabo niini nga nakigpinusilay sa mga operatiba.
Ang padayong gipangita mao si kanhi Police Master Sergeant Lowelle “Boyet” Pacolaga .
Ang kapolisan sa Cordova Police Station nga gipangulohan sa ilang hepe nga si Police Captain Efren Diaz Jr. miingon nga gimandoan sla ni Police Colonel Roderick Mariano, hepe sa Cebu Provincial Police Office (CPPO) paglusad og manhunt batok kang Pacolaga.
Si Pacolaga mao untay target sa buy bust operation sa kapolisan sa Cordova diha sa Purok Kumpang, Barangay Bangbang sa nahisgotang lungsod niadtong Oktubre 9 sa hapon.
Apan niresulta kini sa panag-engkuwentro iyang grupo ug sa kapolisan human nga nisukol ang iyang mga kauban nga nakigpinusilay sa mga polis.
Atol sa butobuto giingong nakahigayon sa pagikyas si Pacolaga apan napatay ang duha niya ka mga sakop.
Ang maong police nga si Pacolaga nga taga Barangay Bangbang sa Lungsod sa Cordova nadestino kaniadto sa Lapu-Lapu City Police Office (LLCPO) sa City Intelligence Branch (CIB) apan mi-AWOL niadtong tuig 2016 tungod sa kalambigitan sa illegal nga drugas. (/IBM)(BANATNEWS)
- Latest