Mga lugar sa Talisay naproblema og tubig
CEBU, Philippines – Pipila na ka lugar sa Dakbayan sa Talisay ang nagkaproblema na usab og tubig hinungdan nga subsob karon ang pagrasyon og tubig diha sa bukirang barangay sa siyudad ug lakip diha sa Talisay City Hall.
Gumikan niini aduna nay mga gipangpaskin nga pahinumdom sa katawhan nga dili mag-usik-usik sa tubig.
Gani kagahapon, ang kabomberohan na sa siyudad ang nimisbis sa mga tanom diha sa Plaza Talisay aron makasugakod kini sa nag-usab-usab nga panahon.
Matud ni SFO2 Marcelino Aguilar sa Talisay City Fire Station nga nangayo na usab og ayuda kanila ang Talisay City Jail tungod sa kanihit sa tubig.
Si Mayor Gerald Anthony “Samsam” Gullas, Jr. nibutyag nga daghan na siya og reklamo nga nadawat labot sa tubig ilabi na ngadto sa Metropolitan Cebu Water District (MCWD).
Ang konseho sa siyudad nipatawag sa representante sa MCWD aron mahatagan sila og katin-awan kalabutan sa problema sa ka kuwang sa supply og tubig.
Usa ka dako nga water tanker ang gigamit sa kabomberohan sa siyudad sa pagrasyon og tubig.
Si Gullas nagplano sa pagpalit usab og gamay nga water tanker nga maoy mohatud diha sudlonon nga lugar sa siyudad. (/BDB)(BANAT NEWS)
- Latest
