Protesta batok hungaw sa power plant sa Toledo

CEBU, Philippines – Nagpahigayon og lihok protesta ang climate ug environment groups sa buhatan sa Department of Energy ug Department of Environment and Natural Resources tungod sa giingong coal fired power plant leaks sa Bato, Dakbayan sa Toledo niadtong Septiyembre 30.

Si Teody Navea, convenor sa Philippine Movement for Climate Justice-Cebu Chapter, niingonnga tuyo nila nga matubag ang maong problema diin ang kabaho sa hungaw sa planta niabot sa tulo ka barangay.

“Nagpasang-at ang mga tawo og reklamo sa barangay, wala’y lihok unya hangtud karon natingala na ang mga tawo nganong wala man ni panumbalinga ning planta nga tua didto, so dapat naay lihokon atong gobiyerno, it’s either imbestigahan aron mapahunong og makadaut man gali na sa katawhan ug kinaiyahan,” matud ni Navea.

Buot sa grupo nga ma-pressure ang mga ahensiya sa gobiyerno nga mohimo og lakang ug dili magpakahilom sa maong hitabo.

Gawas sa rally nga gihimo sa grupo, asoy ni Navea nga duna sila’y ipasaka nga reklamo ngadto sa DENR.

Atol sa maong lihok protesta dunay mga bata ingon man mga tiguwang ang nagsul-ob og mask diin asoy ni Navea ang mga tawo sa Toledo nagkasakit tungod sa maong hitabo.

Hinoon kagahapon ang mga representante sa Philippine Movement for Climate Justice nagkasabot na ug si Environmental Management Bureau 7 Director William Cuñado sa paghimo og inspeksiyon sa lugar sunod semana sanglit karon pa sila kadawat sa maong reklamo. (/GMR)(BANAT NEWS)