Nag-motor gipusil patay

CEBU, Philippines – Patay ang usa ka lalaki nga gipusil sa riding-in-tandem sa Barangay Mactan, Dakbayan sa Lapu-Lapu alas 10 pasado niadtong Martes sa gabii.

Si Police Major Narciso Ababo nga maoy hepe sa Presinto 2 sa Lapu-Lapu City Police Office (LLCPO) niila sa biktima nga si Admer Seroy, 29-anyos, nagpuyo sa Barangay Punta Engaño, Dakbayan sa Lapu-Lapu.

Matud ni Police Master Sergeant Rheymund Sosmeña, desk officer sa LLCPO Station 1, nga base sa initial nga imbestigasyon nagsakay ang biktima sa iyang motor ug sa dihang naghunong kini tungod kay stop ang signal, kalit kining gipusil sa wala mailhing mamumuno

Giingong kalit lang kining gitaparan sa laing motorsiklo nga giluwanan sa duha ka wala hiilhing mga lalaki.

Ang backrider kalit lang namusil sa biktima sa makaduha ka higayon hinungdan sa pagsaliring ngadto sa daplin sa karsada hangtud nga nalamba human naigo sa maong pagpamusil.

Sumala pa ni Sosmeña nga ang biktima gipusil kini sa iyang ulo nga maoy hinungdan sa hinanali niini nga kamatayon. Human sa pagpamusil dali sab nga nipabulhot sa pagpadagan pahilayo sa maong lugar ang mga mamumuno sakay sa ilang motorsiklo.

Ang igsoon sa biktima nga nahinabi sa mga imbestigador niingon nga natingala kaayo sila sanglit wala man sila kamatikod nga adunay gikaaway ang biktima. Padayon pa ang gihimo nga imbestigasyon sa kapolisan tungod kay blangko pa sila sa motibo sa pagpusil kang Seroy. Nasakmit gikan sa crime scene ang usa ka kabhang sa caliber .45 nga maoy gigamit sa pagpusil patay kang Seroy.

Sa laing bahin, patay na nga nakit-an ang 27-anyos nga lalaki human kini nawala sulod sa pipila ka adlaw sukad nilakaw sa ilang panimalay niadtong Domingo sa may Sitio Awihaw, Purok Lomboy, Barangay Matugan, Lungsod sa Tuburan. Ang biktima naila nga si Simon Lumbab, 27, ulitawo ug residente sa maong lugar.

Matud ni Police Patrolman Anthony Panilaga, jailer sa Tuburan Police Station, nga base sa initial nga imbestigation nasuta nga katapusan nga nakit-an si Lumbab niadtong Domingo sa gabii nga nibiya sa ilang balay nga walay pananghid ug nagbitbit kini sa ilang flashlight. Sumala pa ni Panilaga nga adlaw nga Lunes nabalaka na ang pamilya ni Lumbab human wala kini mopatim-aw sa ilang panimalay hinungdan nga nagtinabangay ang mga residente ug silingan sa biktima ug Martes sa ala una sa hapon nakit-an nalang kining naglutaw sa sapa nga wala nay kinabuhi ug niaksyon na og burot.

Daku ang pagtuo sa pamilya nga aksidente kining natagak sa sapa apan ipaubos pa kini sa autopsy aron masayran kung wala bay foul play ang kamatayon ni Lumbab. (Rowena D. Capistrano/GMR)(BANAT NEWS)