Doktor sa tambalanan sa Argao nag-walkout?

CEBU, Philippines – Mopahigayon og imbestigasyon si Gobernador Gwendolyn Garcia kalabot sa giingong pagbiya sa mga doktor diha sa Isidro C. Kintanar Memorial Hospital sa Lungsod sa Argao.

Gikataho nga ang maong mga doktor nihunong kini sa pagserbisyo human nga ang Kapitolyo nagsugod na sa pag-outsource og mga personnel.

Sa report sa dyLA radio, si kanhi mayor ug inilang doktor sa Lungsod sa Argao Dr. Stanley Caminero nibutyag nga iyang nahinabi ang usa ka doktor nga nipauli ug nisaad nga mobalik sa trabaho.

Giingong niangkon ang maong doktor nga wala kauyon sa dako nga deperensiya sa sweldo kon ipaubos sila sa agency.

Nasayran nga gikan sa P70,000 nga sweldo dili na moabot og P50 mil ang sweldo kon i-outsource ang doktor.

Si Dr. Christina Giango, hepe sa Provincial Health Office nagkanayon nga adunay tulo ka doctor sa maong district hospital diin ang usa niini gabii ang duty, ang usa usab kutob na lang pod niadtong Septiyembre 30 ang kontrata tungod kay job order kini ug wala na mopaubos pa sa outsourcing samtang ang usa maoy ni-resign ug ni “walk out” niadtong Miyerkules.

Samtang si Garcia nagkanayon nga gamay ang madawat nga sweldo kon outsource apan maka-cover usab ang mga outsourced personnel sa benefits subay sa balaod. (/BDB)(BANAT NEWS)