Gullas: Litsonero sa Talisay dili na angayang mabalaka

CEBU, Philippines –Mga litsonero dili na angayang mabalaka tungod kay makasulod na sa Probinsiya sa Sugbo ang mga baboy gikan sa Negros.

Sayo pa, ang mga litsonero sa Dakbayan sa Talisay nagpakitabang kini kang Mayor Gerald Anthony “Samsam” Gullas, Jr. ilabi na nga nagsingabot ang kapistahan sa siyudad diin magpahigayon kini sa ilahang “Halad Inasal Festival”. Ang mga litsonero nipadayag nga naglisod na sila og pagpangita og mga baboy nga ilang litsonon.

Atol sa pista sa siyudad matag residente niini nga maghikay aduna gyud kini lechon nga baboy nga idalit sa mga bisita. Ang Dakbayan sa Talisay naila kaayo kini sa lamiang lechon nga baboy.

Ang siyudad magsaulog sa ilang kapistahan karong Oktubre 15, 2019 diin ang ilang patrona mao si Sta. Teresa de Avila.

Ang mga kalihukan kalabutan sa pista magsugod karong Oktubre 5, 2019 samtang ang Halad Inasal Festival masaksihan atol sa adlaw sa pista diin ang mga contigent nga naggikan sa nagkalainlaing eskwelahan sa siyudad ang mopasundayag sa ilang sayaw.

Sa laing bahin, si Gobernador Gwendolyn Garcia niklaro nga ang iyang gibuhat mao lang ang pag-regulate sa mga baboy nga makasulod sa Sugbo sa kabalaka nga makasulod ang African Swine Fever (ASF) nga naggikan sa kaulohan.

Si Gullas nipasabot niini sa mga litsonero nga motuman lang sila sa kamanduan ni Garcia apan gipanghinaot sa mayor nga mabalik sa normal ang sitwasyon. (/BDB)(BANAT NEWS)