Lihok protesta way epekto sa publiko

CEBU, Philippines —  Malinawon ang lihok protesta sa dili mominus sa 50 ka drayber nga sakop sa Pinagkaisang Samahan ng mga Tsuper at Operators Nationwide (Piston)-Cebu Chapter kagahapon.

Ang grupo naglakaw gikan sa usa ka mall sa North Reclamation Area sa Dakbayan sa Sugbo padulong sa buhatan sa Land Transportation Franchising and Regulatory Board 7. Matud ni Police Regional Office 7 Director Debold Sinas nga ang kanunay malinawon ang susamang kalihukan sa Sugbo dili sama sa kaulohan.

Nabantayan sab ni Sinas nga dili na kaayo suportado sa mga Sugbuanon ang susamang lihok protesta.

Ang pangulo sa Lapu-Lapu City Disaster Risk Reduction and Management Office, Nagiel Bañacia, nibutyag nga normal ra ang dagan sa mga sakyanan ug walay natanggong nga mga pasahero padulong sa trabaho ug eskwelahan.

Wala sab kadagan ang giandam nga mga sakyanan sa kagamhanan sa Dakbayan sa Mandaue matud ni Norma Lataban sa Command Center sa siyudad.

Una nga gipahibawo sa kadagkuan sa PISTON nga magpahigayon lang sila og lihok protesta sa buhatan sa LTFRB-7 isip pagpadayag sa ilang pagsupak sa modernisasyon of public transportation sa nasud nga moresulta sa pagpapas sa mga public utility jeepneys (PUJs).

“Kining mga nanguyog sa protest rally mao kini sila ang mga drayber sa Mandaue ug Lapu-Lapu nga gabii mobiyahe,” matud ni Greg Perez, pangulo sa PISTON-Cebu.

Gitataw niya nga kun maoy himoon ang transport strike, magbutang gyud sila og mga stations aron pagpahunong sa mga mobiyahe nga PUJs.

Wala ra sab apektuhi ang Siyudad sa Talisay sa maong lihok protesta.

Matud ni Jonathan “Joy” Tumulak, traffic czar sa dakbayan, nga normal ra nga adlaw ang nahitabo kagahapon. (GMR) (BANATNEWS)