Grupo uyon ban sa baboy sa CV magpadayon

CEBU, Philippines – Uyon ang Central Visayas Pork Producers (CeViPPCo) ug Cebu Associations of Veterinary Salesforce (CAVS) nga magpadayon ang pag-ban sa buhi ug karneng baboy sa Central Visayas.

Kini gipadayag sa grupo atol sa ilang pagpakigtagbo nilang Gobernador Gwendolyn Garcia sa Sugbo ug Gob. Roel Degamo sa Negros Oriental nunot sa panawagan sa mga magpapatigayon sa Luzon nga libkason ang ban sa Sugbo subay sa executive order ni Garcia.

Sigun ni Rolando Tambago, presidente sa CeViPPCo, nga atol sa maong tigum ilang nasabutan nga magpadayon ang ban sulod sa 100 ka adlaw.

“Kami we are the producers of pigs mas pabor sa atua because the objective is to protect the Visayas, Mindanao, especially Cebu and Bohol nga dili makasulod tong African Swine Fever nga gikan sa Luzon karon,” sigou ni Tambago.

Si Tambago niingon nga duna sila’y igong suplay sa baboy apan iyang giangkon nga dunay kakuwang nga 15 porsyento apan sa sitwasyon karon nga tungod sa kahadlok sa mga konsumedor sa ASF nikunhod ang konsumo maong wala ray problema.

Sa ulahi nilang talaan, ang konsumo niubos og 20 porsyento hinungdan nga sila nikampanya pinaagi sa ilang mga partners ug sa mga tigbalita nga mahibawo ang mga konsumedor nga angayan mokaon og Pinoy pork ilabi na sa Sugbo kay luwas ug limpyo ang karneng baboy nga ilang gibaligya sa kamerkaduhan.

Sa pagkakaron 100 ka adlaw lang ang ilang gitan-aw nga ban sa mga karne ug processed pork gikan sa Luzon samtang kanunay gi-monitor ang sitwasyon sa Luzon diin duna sila’y partners didto nga naghatag sab nila og impormasyon.

Sa dili pa mapupos ang 100 ka adlaw makigkita sila og balik sa gobernador ug kun pananglitan makita nila nga maayo na ang sitwasyon sa Luzon, irekomendar nila nga libkason ang ban bisan og wala pa maabot ang 100 days. Gipaneguro sab nila nga sa Central Visayas wala’y kaso sa ASF ug gihimo nila ang tanan aron matabangan ang gobiyerno diin naghimo sila og education, information, surveillance ug monitoring team. (/GMR)(BANAT NEWS)