Benepisyaryo sa GCTA gipusil patay
CEBU, Philippines – Patay ang giingong usa ka benepisyaryo sa Good Conduct Time Allowance (GCTA) Law human gipusil patay sa may dalan MJ Cuenco, Mabolo, Dakbayan sa Sugbo niadtong Martes sa gabii.
Ang biktima giila nga si Francisco Mondares Vinluan, 43, taga Barangay Yati, Liloan, ug giingong napakyas sa pagtahan sa gitagal ni Presidente Rodrigo Duterte.
Matud ni Police Captain Dexter Basirgo, hepe sa Mabolo Police Station, nga ang biktima gihukmang mabilanggo sa 20 hangtud sa 40 ka tuig sa kasong murder apan human sa 14 ka tuig gibuhian kini niadtong Hunyo.
Giingong nibisita ang biktima sa iyang mga paryente sa Sitio Extacion, Mabolo ug sa pag-uli niini alas 10 pasado sa gabii sakay sa iyang motorsiklo, kalit lang gipusil sa laing sakay sab og motorsiklo.
Nakuha gikan sa lawas sa biktima ang dili mominus 8 gramos sa gidudahang shabu nga balor og 42,000. “We learned sa iyang pamilya, gikan sa Muntinlupa sa kasong murder, atong gipangutana kung naka-avail ba sa GCTA, pero according sa iyang mga kapamilya, wala kuno,” sigun ni Basirgo.
Si Basirgo nagtuo nga dili imposible nga si Vinluan nakagawas tungod sa GCTA.
“Ug atong tan-awon, ang kasong murder, 20 hangtud sa 40 na siya ka tuig, unya 14 ra siya ka tuig nabilanggo sa Bilibid, so seguro a big possibility naapil sya sa GCTA,” matud ni Basirgo.
Sa wala pa ang insidente, ang kapolisan sa Mabolo Police Station nakadawat na og taho nga dunay usa ka “Kiko” ang namaligya og ginadiling drugas sa may Ayala access road.
“Si Francisco ug si Kiko is the same person. Gi-confirm ni sa kapitan gabii,” matud ni Basirgo.
Ang inisyal nga imbestigasyon nagbutyag nga si Vinluan walay trabaho sukad sa iyang paglaya gikan sa bilanggoan. (/GMR)(BANAT NEWS)
- Latest