Upat sikop sa drug raid sa Cebu City ug Talisay

CEBU, Philippines — Nikabat ngadto sa P680 mil nga balor sa drugas nga nasakmit atol sa gipahigayong buy-bust operation sa kapolisan kagahapon sa kadlawon diha sa Arellano Boulevard, Barangay San Roque, Dakbayan sa Sugbo.

Nasikop usab sa maong operasyon si Garby Jumao-as, alyas “Abing”, 40-anyos, residente sa maong lugar ug high value target sa regional level.

Nasakmit gikan sa suspetsado ang mga pinutos nga ginadiling drugas nga nitimbang tanan ngadto sa 100 gramos ug nibalor sa P680 mil.

Sa laing bahin, nasikop usab ang usa ka kutsiro nga nag-sideline og pamaligya og ilegal nga drugas uban sa laing duha ka lalaki diha sa Sitio Laray Kabayoan 1, Barangay San Roque, Dakbayan sa Talisay niadtong Huwebes sa gabii.

Ang subject sa operasyon mao si Ryan Pinoy Abatayo, 34-anyos, nagpuyo sa maong dapit.

Samtang ang iyang mga kauban mao sila si Angelito Mijares Estacion, 43-anyos ug Richard Sembrano Regis, 34, pulos nagpuyo sa maong dapit.

Si Police Captain Nazarino Emia, deputy chief sa Talisay City Police Station kinsa maoy nangulo sa operasyon nibutyag nga nakadawat sila og report kabahin sa ilegal nga kalihukan ni Abatayo.

Matud pa ni Emia nga naabtan pa nila nga nagbahig ang mga dinakpan sa ginadiling drugas nga ilang ipangbaligya.

Nasakmit gikan sa mga suspetsado ang 13 ug usa ka medium nga paketeng shabu nga nitimbang og 1.63 gramos ug gibana-banang nagkantidad tanan og P11,084; drug paraphernalia ug buy-bust money nga P200. (Gabriel C. Bonjoc/BDB)(BANATNEWS)