Litsonero sa Talisay naglisod na og suplay sa baboy

CEBU, Philippines — Ang mga litsonero sa Dakbayan sa Talisay nakabatyag na og kalisod sa pagpangita nila og baboy nga ma-lechon nga mabaligya ngadto sa ilang mga customer.

Gani ang grupo sa manglitsonay nakigtagbo kang Mayor Gerald Anthony “Samsam” Gullas, Jr. diin gisumbong nila ang ilang nasinati karon.

Ang mga litsonero nagtuo nga ang mga baboy nga gikan sa Negros ang gilakip sa gipugngan nga makasulod sa Sugbo.

Apan si Dr. Mary Thessa Lorraine Alo, city veterinarian nipasabot nga base sa executive order sa gobernador ang mga baboy gikan sa Luzon ra ang gipangpugngan aron kalikayan sa pagkatap sa African Swine Flu (ASF).

Kagahapon nagpahigayon og subsob nga checkpoint ang buhatan ni Alo diha sa national highway sa Barangay Linao sa Dakbayan sa Talisay.

Gisiguro sa city veterinarian nga adunay tukmang papeles ang mga biyahedor sa ilang mga kargang hayopan.

Gibutyag ni Alo nga 30 ka sakyanan ang ilang napara diin ang katunga sa maong gidaghanon ang nasuta nga kuwang og mga dokumento.

Hinuon gipasabot ni Alo nga gikan ra sa Sugbo ang maong mga baboy.

Si Gullas sa iyang bahin, gikatakdang makigkita kini sa gobernador aron hisgutan ang yangungo sa mga litsonero sa Dakbayan sa Talisay. (/BDB)(BANATNEWS)