Usa ka most wanted nasikop

CEBU, Philippines – Usa sa most wanted person sa Dakbayan sa Talisay ang nasikop sa kapolisan diha sa Barangay Pooc niadtong Miyerkules sa hapon.

Ang nasikop mao si Rodulf Reyes Echavez, 25-anyos, taga Sitio Maharlika, Barangay Pooc sa nahisgutang siyudad.

Si Echavez adunay warrant of arrest sa kasong rape nga giisyu ni Regional Trial Court (RTC) Judge Glenda Go sa Branch 65 sa Dakbayan sa Talisay.

Ang korte wala motugot kang Echavez nga makabutang og piyansa alang sa iyang temporaryong kagawasan.

Ang nahisgutang kaso batok kang Echavez gipasaka kini sa nilabay’ng tuig.

Giingong si Echavez nagtago-tago kini ug nasigpatan diha sa lugar hinungdan nga ang kapolisan nihimo og operasyon batok kaniya.

Si Echavez nangangkon nga managhigala sila ug ang biktima diin niadtong higayona nagkasabot nga mag-inom.

Laing pangangkon ni Echavez nga dihang nangahubog sila ug ang biktima nagkasabot sila nga magdulog.

Si Echavez ang giila nga top 10 most wanted sa Siyudad sa Talisay. (/BDB)(BANAT NEWS)