Nagkarga og basura gidakop sa Mandaue

CEBU, Philippines – Dakpon ang mga sakyanan nga magkarga og basura nga moagi sa mga dalan sa Dakbayan sa Mandaue nga walay Environmental Transport Permit gikan sa buhatan sa mayor ug pamulthaon og P1,500 sa kalapasan.

Kini human usa ka container van ang gidakop sa illegal parking sa may Ouano Avenue niadtong Septiyembre 17 diin natimahoan ang basura nga karga nga gisulod sa baril. Nasuta nga hospital waste gikan sa Vicente Sotto Memorial Medical Center nga naglakip sa mga syringe, dextrose ug uban pang infectious waste ang karga.

Ang scting assistant head sa City Environment and Natural Resources Office (CENRO) nga si Placido Jerusalem ang nipahibawo sa buhatan sa Environmental Management Bureau aron pagsusi sa container van.

Matud ni Jerusalem nga padulong sa pier area ang van aron paghatud sa maong mga hospital waste padulong sa Cavite diin nahimutang ang usa ka Treatment Facility of Integrated Waste Management.

Sa gihimong pakisusi sa EMB-7 nasuta nga kompleto kini sa mga dokumento apan ang kuwang lang mao ang Environmental Transport Permit gikan sa buhatan sa mayor sa dakbayan nga maoy nakita nga kalapasan.

Gitataw hinoon sa legal team sa VSMMC nga gikontrata nila ang Oceanic Cargo Shipping sa Dakbayan sa Mandaue nga maoy mokarga sa mga hospital waste hinungdan nga nahidangat sila sa dakbayan.

Samtang gidapit ni Lapu-Lapu City Mayor Junard “Ahong” Chan ang mga Oponganon sa pagsalmot sa National Clean Up Day karong Sabado.

Maghiusa sila sa pagpanglimpyo sa kabarangayan sa maong dakbayan uban sa mga kawani sa kagamhanan ug mga opisyal sa barangay.

Dugang gidapit ni Chan ang mga Oponganon sa pagsalmot usab sa duha ka adlaw nga International Coastal Clean Up and Environmental Summit karong Septiyembre 25 ug 26 diin ang limpyohan mao na sab ang kabaybayonan sa dakbayan. (/GMR)(BANAT NEWS)