30 ka PUJ nag-cutting trip sikop sa Talisay
CEBU, Philippines – Niabot sa 30 ka Public Utility Jeepney (PUJ) ang gipangdakop sa mga sakop sa City of Talisay-Traffic Operation Development Authority (CT-TODA) human sila nag-trip cutting.
Gipahigayon ang operasyon niadtong Sabado sa hapon human nakadawat og daghang reklamo ang CT-TODA.
Si Jonathan “Joy” Tumulak, hepe sa CT-TODA nibutyag nga ang rota sa Barangay Basak, Siyudad sa Sugbo padulong sa Dakbayan sa Naga dili molahos sa mao nilang rota giingong anha lang sila kutob sa Dakbayan sa Talisay ug Lungsod sa Minglanilla.
Ang CT-TODA nipatuman sa ordinansa sa siyudad diin ang makalapas niini makabayad og P500 nga multa.
Si Tumulak nagkanayon nga lahi ang signage nga ibutang sa mga drayber diin taman lang sila sa Minglanilla ug Talisay imbes ang rota nila kutob sa Dakbayan sa Naga.
Nakig-alayon na si Tumulak sa Land Transportation Franchising and Regulatory Board (LTFRB)-7 diin ang naulahing buhatan nga nakadawat usab og pareha nga reklamo sa mga pasahero.
Si Mayor Gerald Anthony “Samsam” Gullas, Jr. nihangop sa grupo ni Tumulak human sa mga tawo nga nipadayag usab sa ilang pasalamat tungod kay natubag na ang dugay nilang reklamo. (/BDB)(BANAT NEWS)
- Latest
