Sunog niulbo sa Mambaling

CEBU, Philippines – Naugdaw ang 70 ka panimalay atol sa sunog nga niulbo sa may Sitio Wangyu ug Ipil-ipil, Alaska, Mambaling, Dakbayan sa Sugbo kagahapon sa buntag.

Nadawat sa kabomberohan ang alarma sa sunog alas 11:07 sa buntag hangtud giisa sa Task Force Alpha alas 11:26 ug under control alas 12:05 ug hingpit nga na fire out ala 1:16 na sa hapon.

Ang sunog gituohang nagsugod sa ikaduhang andana sa panimalay ni Mamerto Ravena Jr. ug ipaubos pa kini sa imbestigasyon ang hinungdan sa pag-ulbo sa kayo. Matud ni Senior Fire Officer 3 Lowell Opolentisima, fire investigator sa Cebu City Fire Station, nga ang kalisud sa dalan ug kakuwang sa fire hydrant maoy pipila sa nasugatan nga problema sa kabomberohan.

Wala hinooy gikataho nga nakalas ug naangol atol sa sunog diin gibana-bana nga moabot sa P700 mil ang gibilin nga danyos.

Usa sa mga nasunogan ang kanhi sports writer sa The Freeman ug Banat News nga si anhing Gabriel Malagar kinsa nitaliwan na ug nitapos pa lang unta sa iyang siyam ka adlaw nga nobena niadtong Martes.

Matud ni Gingging Malagar, asawa sa namatay, nga pipila lang sa ilang mga importante nga dokumento ang nakuha tungod kay wala man sila magdahum nga molabang ang kayo tungod sa kakusog sa hangin kay aduna may utlanan nga sapa.

Si Konsehal Seller Salvador sa Barangay Mambaling kinsa chairman sa committee on peace and order nitug-an nga posibleng molapas gyud sa 50 ka panimalay ang apektado sa sunog tungod kay halapad man ang Sitio Wangyu. Dako ang pagtuo ni Salvador nga posibleng tulo ka sitio ang apektado nga naglangkub sa Wangyu, Abbya, ug Ipil-ipil. Ang mga nasunogan matud ni Salvador nga ipahimutang sa Abbya Gym o kaha sa Viking Gym isip temporaryo nilang kapuy-an. (/GMR)(BANAT NEWS)