Negosyante gipusil patay

CEBU, Philippines – Patay ang usa ka negosyante nga gipusil sa riding-in-tandem sa Barangay Poblacion, Lungsod sa Compostela alas 11 pasado sa buntag niadtong niaging adlaw.

Si Police Staff Master Sergeant Fedelito Hopia sa Compostela Police Station niila sa biktima nga si Mark Benedict Untal, 40, nanag-iya og tindahan sa maong lugar.

Matud ni Hopia nga nahiabot ang biktima sa iyang tindahan nga nagsakay sa iyang motorsiklo ug dihang mo-parking na, ang duha ka wala hiilhing lalaki nga nagsakay sab og motorsiklo nga kolor itom ug pula ang kalit lang nitumaw ug backrider nga nagtaptap putos sa iyang nawong ug nagsul-ob og full face helmet ang kalit lang nipusil sa biktima duha ka higayon.

Ang biktima nga nakabaton og samad pinusilan sa iyang dughan ug bukton ang nahagba ug ang mga mamumuno dali kining nisibat.

Dali untang gidala sa iyang pamilya ang biktima sa Danao Provincial Hospital apan gideklarar nga dead on arrival.

Sa pagkakaron blangko pa ang kapolisan sa motibo sa pagpatay sa biktima samtang gihimo ang dugang imbestigasyon. (Rowena D. Capistrano/GMR)(BANAT NEWS)