Certificate of demolition sa Apas gikwestiyon
CEBU, Philippines — Gihangyo ni Cebu City Mayor Edgardo Labella si Presidential Commission for the Urban Poor (PCUP) Coordinator Jacquline Visitacion nga ipasabot ang iyang giingon nga pagkalambigit sa pagpagawas sa sertipiko nga ipadayon ang pagdemolis sa kabalayan sa Lot 937 Barangay Apas.
Sa Septiyembre 13 nga suwat, ang mayor nihangyo nga ipa-atras o withdraw ang PCUP Certificate nga gikataho nga anomaloso nga gipagawas.
"If you fail to do so, I will be inclined to believe that you may have facilitated in the issuance of the said questionable PCUP Certificate,” sigun sa mayor.
Giingon ni Labella nga gihatagan siya og kopya sa suwat ni Solicitor General Jose Calida ngadto kang PCUP Chairperson Alvin Feliciano ug Agosto 15-Urgent Omnibus Motion of the Office of the Solicitor General.
Dugang sa mayor nga ang duha nga komunikasyon gikwestiyon ang pagpagawas sa sertipiko sa PCUP nga nagpasabot sa pagkompleto sa pre-demolition conference sa kaso.
Gihangyo na ni Calida ang PCUP nga ipahamtang ang aksyon sa pagdisiplina sa mga empleyado nga responsable sa pagpasa sa mga bakak nga sertipikasyon nga nagpaila nga natapos ang pre-demolition conference kauban ang mga residente sa Lot 937 sa Barangay Apas.
Si Labella nagkanayon nga gusto niya nga hatagan og higayon ang PCUP aron ipasabot ang iyang giingon nga pagkalambigit sa pagpagawas sa mga kwestiyonable nga mga dokumento.
Ang Lot 937 mao ang lugar diin gitugutan ang mga pamilya sa mga retiradong sundawo nga magtukod og mga balay sa lugar kaniadtong 1960.
Unang gihatag sa korte ang hangyo sa nangangkon sa luna nga si Mariano Godinez aron ipatuman ang writ of demolition sa mga balay sa lugar. (GMR) (BANAT NEWS)
- Latest
