Petisyon batok pagbaligya sa SRP gipatubag sa korte

CEBU, Philippines — Gipatubag sa Regional Trial Court Branch 10 sila si Cebu City Mayor Edgardo Labella ug mga sakop sa konseho ingon man mga representante sa mga higanteng kompaniya nga nagpalit sa 45.5-ektaryang luna sa South Road Properties sa reklamo nga gipasaka ni kanhi mayor Tomas Osmeña.

Lakip sa gikiha ni Osmeña ang kadagkuan sa SM Prime Holdings, Inc., Ayala Land, Inc., Cebu Holdings, Inc., Filinvest Land, Inc., Filinvest Alabang, Inc., Cyberzone Properties, Inc., Anesy Holdings Corporation, Igold Holdings Corporation, ug Betterfield Phils. Corp. aron mapahunong ang siyudad sa paggasto sa kwarta nga halin.

Ang summon gipirmahan ni RTC Branch 10 Clerk of Court V Atty. Yvonne Epondulan.

Gituki atol sa sesyon sa konseho sa siyudad ang maong summon ug gipatugyan ni Konsehal Raymond Alvin Garcia ngadto sa City Legal Office aron maoy motubag niini ngadto sa korte

Sa iyang bahin, si City Attorney Rey Gealon niingon nga ang iyang opisina andam sa pagtubag sa petisyon.

Nagtuo si Gealon nga ang petisyon nga gipasaka ni Osmeña susama ra kang kanhi prosecutor Romulo Torres.

Matud ni Gealon nga ang RTC ug ang Court of Appeals nibasura na ug ni-deny sa petisyon ni Torres.

Dugang niya nga walay pagduha-duha nga ang petisyon nga gipasaka ni Osmeña isalikway ra sab sa korte.

Gipasabot ni Gealon nga ang mga hukmanan nagmando na sa siyudad nga valid ug legal ang pagbaligya sa 45.5-ektarya nga luna sa SRP.

Si Osmeña, sa iyang reklamo nag-ingon nga adunay daghang depekto sa Negotiated Sale on Installment nga gipatuman kaniadtong Agosto 7, 2015 nga naglambigit sa pagbaligya sa 26.3 ektarya nga yuta sa consortium sa Ayala Land, Cebu Holdings, Inc. ug SM Prime Holdings sa P10 bilyones ug ang 19.2-ektaryang kabtangan nga gibaligya sa Filinvest Land Inc. sa P6.7 bilyones.

Lakip sa gitumbok nga “mga depekto” mao ang wala’y gihatag nga awtoridad ang konseho sa Siyudad sa Sugbo nga mosulod sa Negotiated Sales on Installment; ang Konseho sa siyudad nipasa sa usa ka resolusyon nga dili ipadayon ang proseso sa pag-bid sa mga luna sa SRP; ang konseho sa siyudad nipasar sa resolusyon nga nagpaundang sa dugang nga aksyon sa pagbaligya sa luna sa SRP; ug uban pa. (GMR) (BANAT NEWS)