Pagsaulog sa pista sa Danao malinawon — PNP
CEBU, Philippines — Pagsaulog sa kapistahan ni Santo Tomas de Villanueva nga maoy patron sa Dakbayan sa Danao niadtong Domingo ang malinawon.
Giingong sukad sa adlaw sa bisperas hangtud sa adlaw sa kapistahan walay natala nga krimen ang kapolisan sa siyudad.
Si Police Staff Master Sergeant Rene Camargo sa Danao City Police Station nagkanayon nga atol sa nagkadaiyang kalingawan nga gipahigayon atol sa pista malinawon kini.
Gibutyag ni Camargo nga 300 ka polis nga nagsilbing augmentation force ang gidestino sa pagbantay diha sa mga lugar diin gipahigayon ang mga kalingawan.
Matud ni Camargo nga nagdasok ang mga tawo nga namista sa dakbayan apan wala sila’y natala nga mga panghitabo.
Si Camagro nagkanayon nga posibleng ang pagpakatap og mga polis diha sa mga lugar sa siyudad ang nakapanagana sa mga badlongon sa pagbuhat og krimen.
Dugang ni Camargo nga ang tinuig nga kapistahan sa patron sa maong dakbayan ang gibisita usab sa mga relihiyosong Katoliko gikan sa sikbit nga mga lungsod alang usab sa ilang pagpamista ug pagpanagkot niini. (BDB) (BANATNEWS)
- Latest
