Mga libudsuroy nga hayopan ipahipos

CEBU, Philippines —  Giawhag karon sa konseho sa Dakbayan sa Mandaue ang City Veterinarian Office nga gipangulohan ni Dr. Karen Marilles sa pagpangita og paagi alang sa paghipos sa mga libudsuroy nga hayopan nga maglakawlakaw diha sa dalan ug pipila niini anaa gibutang sa bakanteng luna sa reclamation area.

Si Konsehal Jimmy Lumapas, chairman sa committee on market, transportation, communication and utilities sa iyang gipalabang nga resolusyon nag-awhag kang Dr.  Marilles ug sa giumol nga task force sa paghimo og mga pamaagi alang sa paghipos sa mga libudsuroy nga hayopan.

Naglakip sa mga hayopan nga naghatag og risgo sa mga motorista nga moagi sa lugar mao ang iro ug iring nga kalit lang molabang diha sa karsada nga usahay maoy hinungdan usab sa aksidente.

Matud ni Lumapas nga ang mga hayopan nga maglakawlakaw sa dalan ngil-ad usab kini nga tan-awon ilabi na sa mga dumoduong.

Ang tag-iya sa maong mga hayopan gikinahanglan nga masayod kini sa ilang obligasyon diin kinahanglang atimanon nila kini aron dili makahatag og kahasol ngadto sa ubang mga tawo.

Si Lumapas nagkanayon nga adunay pipila ka nagbuhi og hayopan ang namatikdan nga gituyo sa pagbutang diha sa bakanteng luna sa reclamation area ang ilang mga binuhing kanding, kabayo ug baka.

Mabantayan nga gibuhian lang sa tag-iya ang maong mga hayopan diha sa bakanteng luna ug delikadong kalit lang kini nga molabang diha sa dalan nga makahatag og kahasol sa mga motorista. (BDB) (BANATNEWS)