Kita sa probinsiya sa 8 ka buwan niubos
CEBU, Philippines — Mas ubos ang koleksyon sa Probinsiya sa Sugbo gikan sa buwan sa Enero hangtud Agosto karong tuiga itandi sa susamang mga buwan sa 2018.
Base sa record sa provincial treasurer, niabot sa P895 milyones ang kita sa probinsiya sulod sa walo ka buwan sa niaging tuig apan karong tuiga niabot lang sa P617.2 milyones.
Matud ni Provincial Treasurer, Atty. Roy Salubre, nga mas daku ang kita sa tuig 2018 tungod sa pagkahalin sa Cebu International Convention Center (CICC) nga gibaligya ngadto sa Dakbayan sa Mandaue og P300 milyones.
"Kung buot huna-hunaon nisaka atong kita karon. Kay last year man to ang CICC nabaligya," matud ni Salubre.’
Kun wala nahalin ang CICC, anaa lang unta sa P595 milyones ang kita sa probinsiya sulod sa walo ka bulan sa niaging tuig.
Ang Internal Revenue Allotment karong tuiga mas daku hinoon kun itandi sa 2018 diin P2.257 bilyones karong tuiga samtang P2.081 bilyones sa 2018.
Ang kita sa Cebu South Bus Terminal (CSBT) gikan sa P43.1 milyones sa niaging tuig nisaka kini sa P43.5 milyones karong tuiga.
Sa mga provincial ug district hospitals, P244 milyones ang kita sulod sa walo ka buwan sa tuig 2018 samtang P247 milyones usab sa tuig 2019. (GMR) (BANATNEWS)
- Latest
