Pataka og parking sa Sogod sikopon
CEBU, Philippines — Higpit karon nga gipanghawanan sa kapolisan ang kadalanan sa Lungsod sa Sogod pinaagi sa pagdakop sa mag-illegal parking nga mga pribado ug publiko nga sakyanan, traysikol ug motorsiklo.
Si Police Lieutenant Harvey Acop, hepe sa Sogod Police Station ang nimando sa iyang mga sakop sa paghawan sa mga daplin sa kadalanan isip pagsanong sa kamandoan sa Department of Interior ang Local Government (DILG) sa paghawan sa kadalanan aron moluag ang trapiko ug malikayan ang aksidente.
Lakip sa gipanghawanan sa kapolisan ang mga ilegal nga estraktura o mga tanom nga nakaali sa mga sidewalk.
Nunot sa maong pagpanghawan sa mga daplin sa kadalanan sa lungsod si Acop niawhag ngadto sa mga nanag-iya og sakyanan sa pagpangita og legal nilang ka parkingan.
Kagahapon sa buntag si Acop ang nangulo sa iyang mga sakop sa pagpahigayon og cleanup drive sa Barangay Poblacion sa nahisgutang lungsod.
Ang kapolisan, opisyales sa barangay ug Sangguniang Kabataan (SK) sa nahisgutang lungsod nagkahiusa sa pagpahigayon sa maong cleanup drive diin nanglimpiyo usab sila diha sa kabaybayonan ug kasapaan alang sa pagmentinar sa kalimpiyo sa palibot sa nahisgutang lungsod. (/BDB)(BANATNEWS)
- Latest