P170 milyon shabu nasakmit sa 41 ka adlaw

CEBU, Philippines – Dili mominus P170 milyones nga balor sa ilegal nga drugas ang nasakmit sa kapolisan sulod lang sa Agosto 1 hangtod Septiyembre 10. Kini sumala pa ni Police Regional Office Director Debold Sinas human sa ila gihimong monthly checking sa mga nasakmit nga drugas aron ma-monitor og maayo.

“I told the intel people to re-assess na instead na mugamay, mas daghan pa gihapon mi nadakpan,” matud ni Sinas.

Duha ka factors ang ilang gitan-aw nga mao ang giingong dakung supplier gikan sa Marawi paingon sa Sugbo ug gipangapod-apod sa lainlaing bahin sa probinsiya.

“Diri na siya then gigukod, then nakapag-bail, tapos wala na siya diri. Didto na ni siya sa Marawi nag-base,” sigun ni Sinas. Ang giingong supplier gikan sa Marawi adunay network sa Sugbo diin naghuwat lang ang mga awtoridad sa husto nga higayon nga kini masikop.

Nakig-alayon na ang mga awtoridad sa Sugbo sa ilang mga kauban sa Marawi.

“Daku ni siya. Isa siya sa mga daku nga syndicate nga gi-monitor nga active sa ato karon. Kini siyang grupoha ni mao ni nadunggan namo nga nagpagawas og 15 kilos,” dugang ni Sinas.

Nimando na sab si Sinas sa pag-monitor sa pagsulod sa marijuana sa lalawigan tungod kay sa ilang pag-monitor nakita nila nga nahimo kining paborito sa kabataan.

Samtang dul-an sa P15 milyones nga balor sa drugas ang nasakmit sa kapolisan ug Philippine Drug Enforcement Agency sa managlahi nga oras sa Dakbayan sa Sugbo.

Unang operation nahitabo sa may Sitio Caimito Street, Basak San Nicolas alas 4 sa hapon niadtong Martes nga gikasikop ni Marvin Makilang, 24, manindahay og prutas.

Nasakmit gikan kang Makilang ang 125 gramos sa gituohang shabu nga mobalor og P850 mil, buy-bust money, usa ka mobile phone, bag, notebook ug motorsiklo.

Matud ni Leia Albiar-Alcantara, tigpamaba sa PDEA-7, nga dul-an sa usa ka semana ang case build-up batok kang Makilang. Nasayran sab sa mga tinugyanan sa PDEA-7 nga si Makilang maka-dispose og dili mominus usa ka kilo sa ginadili nga drugas matag semana.

Ikaduhang operation sa may Sitio Galili, Duljo Fatima alas 6:45 sa gabii nga gikasikop ni Ariane Ann Reyes, high-value target regional level, 27, dalaga ug residente sa maong lugar.

Nasakmit gikan kang Reyes ang mga pinutos sa ginadiling drugas nga mobalor og P12.2 milyones lakip ang buy-bust money.

Katapusan nga nasikop mao sila si Isidro Nodalo alyas Botex, 45, walay trabaho ug residente sa Sitio Bato, Ermita ug Brian Espina, 31, ulitawo, taga Barangay Sambag 2. Nasakmit gikan sa duha ka dinakpan ang small ug medium size sa ginadili nga drugas nga mobalor og P408 mil.

Ang mga dinakpan nagtingkagol sa selda sa kapolisan ug gipaabot ang pagsang-at sa tukma nga kaso. (Iris Hazel M. Mascardo/GMR)(BANAT NEWS)