Konsehal, trabahante gipusil patay

CEBU, Philippines – Kanhi drug surrederer ug kasamtangang konsehal sa Barangay Paculob, Dumanjug ang gipusil patay samtang nagtan-aw og volleyball alas 6 pasado niadtong Martes sa gabii sa Barangay Ylaya sa maong lungsod.

Ang nakalas mao si Joselito Aniñon alyas Suma, 34, minyo, samtang wala mailhi ang nag-inusara nga mamumuno kinsa sakay og motorsiklo nga nag-jacket ug nag-bonnet.

Matud ni Police Staff Sergeant Ian Joseph Arapoc, desk officer sa Dumanjug Police Station, nga samtang nagtan-aw og volleyball ang biktima, nagduwa-duwa sab kini sa iyang cellphone dihang kalit niabot ang mamumuno dayun pusil ngadto kaniya.

Ang biktima nakaangkon og duha ka samad pinusilan sa iyang tuong nawong ug tuong dughan hinungdan nga dali kining gidala sa Barili District Hospital apan gideklarar nga dead on arrival. Ang mamumuno dali nga nisibat sakay sa motor padulong sa Lungsod sa Barili.

Nagtuo ang kapolisan nga personal nga bangi ang hinungdan ug may kalabutan sa ilegal nga drugas human gihugon-hugon nga nalambigit kini sa pagpayuhot ug kanhi sab nitahan sa iyang kaugalingon sa dihang kusog pa ang kampanya  batok sa ilegal nga drugas.

Samtang usa ka 41-anyos nga lalaki nga maintenance worker sa Department of Public Works and Highways ang gipusil patay sa may Graje, Barangay Guadalupe, Dakbayan sa Carcar niadtong Martes sa hapon.

Ang biktima giila nga si Relando Candia, 41, minyo, lumad nga taga Lungsod sa Sibonga samtang ang duha ka mamumuno angkas sa usa ka motorsiklo ug pulos nag-helmet ug nag-bonnet.

Matud ni Police Corporal Renante Dayuja, desk officer sa Carcar City Police Station, nga naglimpyo sa kanal ang biktima dihang kalit niabot ang mamumuno dayun pusil sa makadaghang higayon hinungdan sa pagkahagba ni Candia.

Dali nga nisibat ang mga mamumuno samtang patay na nga nadangat sa tambalanan ang biktima.

Walo ka kabhang sa kalibre .45 ang nakuha sa crime scene.

Sa laing bahin patay ang usa ka hubog human kini giingong nangita og kaaway sa ilang silingan sa may Barangay Sawang Calero, Dakbayan sa Sugbo atol gyud sa kapistahan sa San Nicolas de Tolentino niadtong Martes sa gabii.

Ang nakalas naila nga si Demetrio Cuyno, 47, residente sa maong lugar, samtang ang mamumuno naila nga silingan ra sab sa biktima nga si Joviet Echevarria, 36-anyos.

Ang biktima gituohang ubos sa ilimnon nga makahubog ug nangita kini og away hinungdan nga napusilan kini ni Echevarria tungod sa kalagot.

Pipila sa kabanay ni Cuyno ang nitug-an nga matag higayon nga ubos kini sa ilimnon nga makahubog mangita gyud kini og away sa ilang mga silingan. (/GMR)(BANAT NEWS)