Mga delata ug ubang produkto sa baboy i-disposed

CEBU, Philippines – Mga delata ug ubang produkto sa baboy nga nasakmit sa African Swine Fever (ASF) Task Force gikan sa mga pantalan ug ubang point of entries sa Probinsiya sa Sugbo ang gikatakdang i-dispose karong adlawa.

Matud ni Dr. Mary Rose Vincoy nga ipaagi sa geothermal destruction ang pag-dispose sa maong mga produkto nga kasagaran gikan sa nasud sa China usa na niini ang nasakmit niadtong Martes nga mga delata sa produkto nga baboy  diha sa Pier 1, Dakbayan sa Sugbo.

Mga alas 4:00 sa hapon karong adlawa adto kini i-dispose sa RRDS Petro-Chemical Industries Inc., usa ka geothermal destruction company nga accredited sa Department of Environment and Natural Resources (DENR) ug Environmental Management Bureau (EMB).

Matud ni Vincoy nga ilang mga nasakmti diha sa Pier 1 sa niaging adlaw ang manufacturing date niini kaniadto pang Disyembre 2018 diin nasulod ra gihapon kini sa time frame human nga nipagawas ang Food and Drug Administration og order sa pag-ban sa mga produkto sa baboy nga gikan sa pipila ka nasud nga gikatahong adunay kaso sa ASF.

Si Vincoy nipahibalo nga niadtong Septiyembre 3, 2019 nikabat sa 48 ka baboy ang ilang gipabalik sa Negros Oriental human kini gitabok sa Samboan port sa Lungsod sa Santander human nasayran nga walay veterinary certificate ug shipping permit ang maong mga baboy.

Adunay 40 ka kilo usab nga baboy nga gikan sa La Libertad Negros Oriental padulong sa Lungsod sa Minglanilla ang gipabalik sa point of origin niini.

Matud usab ni Vinocy nga padayon ang ilang subsob ug hugot nga surveillance ug monitoring sa tanang point of entry sa lalawigan aron pagpugong nga adunay makasulod nga karne o produkto sa baboy nga walay igong permit o dokumento subay sa gipagawas nga executive order sa gobernador pag-ban sa maong mga produkto sulod sa 100 ka adlaw tungod sa hulga sa ASF, hog cholera ug ubang sakit sa baboy. (/BDB)(BANAT NEWS)