Basura ilisan og pagkaon sa Talisay

CEBU, Philippines – Aron maiban-ibanan ang suliran sa basura, tinguha sa kagamhanan sa Dakbayan sa Talisay nga ilisan ang mga plastik nga basura og pagkaon.

Si Mayor Gerald Anthony “Samsam” Gullas Jr. nakahuna-huna sa maong programa human iyang nakita nga grabe ang problema sa basura nga plastik.

Ang grupo sa mayor nakasaksi niini dihang nagpahigayon sila og clean-up drive sa kasapaan.

Ang batan-ong mayor niawhag ni Lagrimas Abarquez, pangulo sa solid waste management sa siyudad, nga dalion ang pagpatuman sa programa nga iyang gilaraw ug gusto niya nga masugdan kini sa sunod buwan.

Si Abarquez nitataw nga sa inisyal nila nga sabot ang usa ka kilo nga plastik sa basura mailisan kini og usa ka lata nga sardinas o ba kaha tunga sa kilo nga bugas.

Dugang ni Abarquez nga ila na nga gihan-ay ang guidelines niini aron masugdan na dayon ang programa.

Ang Siyudad sa Talisay makalabay og 34 toneladang basura matag adlaw. (/GMR)(BANAT NEWS)