Singil sa ATM transaction gikwestiyon
CEBU, Philippines — Gihangyo sa konseho sa Siyudad sa Sugbo ang Bangko Sentral ng Pilipinas (BSP) nga tun-an ang bisan unsang plano nga pagdugang sa bayad sa transaksyon sa automated teller machine (ATM).
Kini tungod sa epekto niini dili lang sa mga Sugbuanon kun dili ang tanan nga naghupot og ATM cards. Sa usa ka privilege speech, gipadangat ni Konsehal Alvin Dizon ang iyang kabalaka sa pagpasaka sa 50 porsyento sa bayad sa transaksyon sa ATM gikan sa P20 ngadto sa P30.
“The impending increase would adversely affect ATM holders especially the minimum wage earners who make ATM withdrawal twice a month as the amount of the increase already constitutes eight percent of the latter’s daily minimum wage. This amount is already significant given the high costs of basic commodities and services,” sigon ni Dizon.
Niadtong Hulyo 19, 2019 ang BSP niluwat og memorandum nga naglibkas sa moratorium sa mga bayranan sa ATM nga gipahamtang unom na ka tuig ang nilabay.
Karon ang mga bangko nagsingil og P10 hangtud P15 matag interbank withdrawal ug P2 alang sa interbank balance inquiry.
Matud ni Dizon nga ang pagsaka sa singil makadaut kini ilabi na niadtong naa sa mga ubos nga sektor.
Tungod niini, gihangyo sa konseho ang BSP nga magpahigayon og konsultasyon sa publiko aron madungog ang ilang sentimento ug epekto niini ngadto sa ekonomiya.
Ang BSP kinahanglan sab molusad og information campaign kung giunsa pagtipig ang bayranan sa mga bangko ug bayad. (/GMR)(BANATNEWS)
- Latest
