Teban Daan namatay
CEBU, Philippines — Nitaliwan na sa laing kalibutan ang kanhi bokal ug karon konsehal sa Dakbayan sa Talisay nga si Julian “Teban” Daan sa edad nga 74-anyos.
Gibutyag sa iyang kamaguwangan nga anak nga si Rodel Daan nga duha ka adlaw ang nilabay na-mild stroke ang iyang amahan hinungdan nga dali kini gidala sa usa ka pribadong tambalanan sa Dakbayan sa Sugbo.’
Apan matud ni Rodel nga wala na makaya pa sa iyang amahan ug namatay kini alas 4:45 kagahapon sa hapon tungod sa heart failure.
“Ang iyang heart ni weak na sad ba,” matud ni Rodel kinsa nidugang nga nabalaka sab ang iyang amahan human nga nasakit ang iyang inahan nga si Bokal Yolanda Daan.
Si Teban gawas nga usa ka politiko naila kaayo kini nga dramatorgo sa Sugbo.
Siya gipaubos sa heart bypass operation niadtong 2013.
Matud ni Rodel nga hayaon ang ilang amahan sa St. Peter Funeral Homes sa Imus Road, Dakbayan sa Sugbo. (Le Phyllis F. Antojado/GMR)
Mga kolorum may kontak sa CT-TODA
Adunay mga sakop sa City of Talisay-Traffic Operation Development Authority (CT-TODA) ang giingong nagpaluyo sa kolorum nga mga sakyanan.
Si Jonathan “Joy” Tumulak, traffic czar sa dakbayan, nga sa niaging semana iyang nadunggan gikan sa mga drayber sa kolorum nga maong dili sila maundang tungod kay naa silay kontak gikan sa CT-TODA. Ang kagamhanan sa siyudad nitabang sa mga kolorum pinaagi sa ilang hangyo nga makig-estorya sa direktor sa Land Transportation Franchising and Regulatory Board.
Apan ang maong ahensiya nitambag nga magpamembro una sila og kooperatiba aron makakuha og prangkisa ingon man pag-angkon og bag-ong van. Si Tumulak nagkanayon nga ang nadunggan niya nga estorya iya na sab nga gipaabot ngadto ni Eduardo Montealto, direktor sa LTFRB-7. Hinuon sa iyang bahin, sugdan na niya ang iyang imbestigasyon kung kinsa sa iyang mga sakop ang nagpaluyo sa mga kolorum aron taktakonsa trabaho. (/GMR)(BANATNEWS)
- Latest