Mga establisamento pabutangon og gender neutral rest room
CEBU, Philippines – Giawhag sa konseho sa Dakbayan sa Sugbo ang tanang establisamento sa siyudad nga magbutang og usa ka gender neutral rest room. Tumong niini aron walay mahitabong diskriminasyon sama ngadto sa usa ka mall sa Quezon City diin ang usa ka transgender woman gisikop ug gipriso human kini wala tugoti sa paggamit sa banyo alang sa mga babaye.
Atol sa session sa konseho sa siyudad kagahapon giaprobahan ang resolusyon nga gipangamahanan ni Konsehal Alvin Dizon.
Matud ni Dizon nga ang maong resolusyon mao ang paghangyo sa mga mall, supermarket, movie houses, hotel, restaurant, hospital, ug tanan nga mga establisamento nga magbutang og banyo alang sa PWD isip usa ka universal o gender-neutral restroom.
Si Dizon nisubay sa City Ordinance No. 2339 kun “An Ordinance Prohibiting Discrimination in the City of Cebu on the Basis of Disability, Age, Health Status, Sexual Orientation, Gender Identity, Ethnicity, and Religion”.
Si Dizon mao ang nigama sa nahisgutang ordinansa niadtong tuig 2012. (/BDB)(BANAT NEWS)
- Latest