Gidagit, gi-salvage
CEBU, Philippines – Patay’ng lawas sa usa ka tawo nga giingong gidagit sa wala mailhing mga lalaki didto sa ilang panimalay sa Barangay Catarman sa Lungsod sa Cordova sa miaging Martes sa kaadlawon ang napalgang patay diha sa bakanteng luna sa Purok Shooting Star sa Barangay Babag sa Dakbayan sa Lapu-Lapu.
Si Police Staff T Sergeant Dan Gacoscosim nga maoy imbestigador sa Lapu-Lapu City Police Office (LLCPO) miila sa maong lalaki nga si Nelson Rosani, 47.
Matud pa Gacoscosim nga ilang gisusi ang pagkatawo sa namatay sanglit dako ang ilang pagtuo nga sa lain kining lugar gipatay ug diha lang gilabay sa bakanteng sa Dakbayan sa Lapu-Lapu.
Dugang pa ni Gacoscosim nga sa crime scene wala silay nakaplagang mga basiyo sa bala maong nagduda silang gilabay lang ang biktima sa lugar.
Ang asawa sa namatay nga ilang gisukitsukit wala masayod sa mga kalihokan sa iyang bana tungod kay kanunay lamang kini sa ilang panimalay ug nag-atiman sa ilang mga anak samtang siya naninda.
Ang asawa mitug-an sa mga imbestigador nga upat ka wala mailhing mga lalaki ang miabot sa ilang balay ug diretsong nisulod ug pugsanong mikuha sa iyang bana.
Ang maong mga lalaki giingong pulos nagsuot og jacket ug nagtabon og itom nga panapton sa ilang mga nawong.
Ang mga sakop sa Scene on Crime Operation (SOCO) miingon nga ang biktima nakaangkon og mga samad pinusilan sa kalawasan nga gituohang nakaingon sa iyang kamatayon. (/IBM)(BANAT NEWS)
- Latest