Luna lakip ang building giuli sa Innoland
CEBU, Philippines — Si Gobernador Gwendolyn Garcia naghunahuna karon sa pagpaabang sa luna nga giuli sa Innoland Development Corporation ngadto sa Kapitolyo.
Ang 849 square meters nga luna diha sa Salinas Drive sa Barangay Lahug nga gipanag-iya sa Kapitolyo ang giabangan sa Innoland sukad niadtong tuig 2014 sa panahon ni kanhi gobernador ug karon Bise Gobernador Hilario Davide, III.
Apan nasayran ubos sa administrasyon ni Garcia nga wala moagi sa pagtugot sa hunta probinsiyal ang pagpaabang sa maong luna og P50 matag metro kwadrado o P42 mil lang ang abang matag bulan.
Kagahapon, pormal na nga gibalik sa Innoland ngadto sa Kapitolyo ang maong luna uban sa gitukod niini nga building.
Matud ni Atty. Marino Martinquilla nga wala nay atubangon nga kaso ang Innoland niini.
Si Garcia nagkanayon nga ang gihimo sa maong kompaniya pagpakita og “good faith” ngadto sa Kapitolyo.
Matud ni Garcia nga kong ilang paabangan ang maong luna apil ang edipisyo mamahimong moapil gihapon ang Innoland.
“On the top of my head, ato nang paabangan pero ato usang kuhaon ang growing rate diha per square meter dili naman lang na tag P50 per square meter”, ni Garcia pa. (BDB) (BANATNEWS)
- Latest