4 kawatan og ligid sa sakyanan sikop

CEBU, Philippines — Gitanggong sa detention cell sa Catmon Police Station ang upat ka tawo nga notadong kawatan og ligid sa mag-parking nga mga sakyanan.

Si Police Lieutenant Jose Dante Talandron, hepe sa Catmon Police Station, niila sa mga dinakpan nga sila si Kenneth Geraldez Capoy, 25, taga Barangay Looc, Dakbayan sa Danao, Darien Serat Declaros, 27,  taga Mabolo, Dakbayan sa Sugbo ug Albert Abulan Claro, 28, taga Mabolo ug Christian Ian Laurente, 30, taga Umapad, Dakbayan sa Mandaue. Matud ni Talandron nga nagpatrolya ang iyang mga sakop sa alas 3:30 niadtong Domingo sa kaadlawon ug nasigpatan ang maroon nga Suzuki multicab nga nagdala og ligid gikan sa nag-parking nga ten wheeler truck  nga giluwanan sa upat ka lalaki.

Dali kining gipahunong ug gipukaw ang drayber sa 10-wheeler truck nga si Allan Banqueran Suarez, 37, ug truckboy ug gisusi ang ilang sakyanan.

Dihang gihimo ang imbestigasyon batok sa mga dinakpan maoy ilang nasayran nga modus operandi na sa mga suspek ang pagpangawat og ligid sa mag-parking nga mga sakyanan sa nagkadaiyang lugar sa Sugbo. (/GMR)(BANATNEWS)