Salimbangon, Bacaltos magbahin sa PCL

CEBU, Philippines — Dili maglangan ang eleksiyon sa Philippine Councilors League (PCL) Cebu Provincial Federation karong adlawa gumikan kay pormalidad nalang ang himoon dayun iproklamar ang mga bag-ong opisyal.

Ang Department of Interior and Local Government nga pangulohan ni Provincial Director Jerome Gonzales isip election chairman ang moproklamar sa grupo nilang Konsehal Francis Edward Salimbangon sa Lungsod sa Tabogon kinsa maoy lang ang nakaduso sa ilang certificates of candidacy kutob niadtong Agosto 14.

Kini nunot sa kasabutan tali sa grupo nilang Konsehal Caroline Bacaltos sa Sibonga nga magbahin nalang sila sa termino gumikan pareho sila og partido.

Si Salimbangon, anak ni kanhi kongresista Benhur Salimbangon, sakop sa National Unity Party samtang si Bacaltos sakop sa Nacionalista Party apan parehong alyado ni Gobernador Gwendolyn Garcia sa Partido Demokratiko Pilipino-Lakas ng Bayan (PDP-Laban) ug 1Cebu Party.

Si Presidential Assistant for the Visayas Michael Dino ang giingong nipatunga sa duha aron dili magkasangka sa PCL.

Matud pa nga ang grupo ni Salimbangon molingkod sa unang 15 ka buwan samtang si Bacaltos ug kaubanan sa mosunod nga 19 ka buwan sa 34 ka buwan hangtud sa Hunyo 30, 2022. 

Ang kaubanan ni Salimbangon mao sila si Konsehal Ricardo “Kuya Nick” Pepito isip bise presidente, Alexseus Celis sa Boljoon isip secretary-general, Jojessa Hortellano sa Tabogon isip treasurer, Mary Greleigh “Lovely” Cabrera sa Santa Fe isip auditor, Emelita Gabito sa Madridejos isip press relations officer ug Engr. Cyrus Otadoy sa Tudela isip business manager.

Ang mga sakop sa board of directors mao sila si Konsehal Elver Ali Abucay sa Daanbantayan, Michael Comedia sa Dalaguete, Marie Immaline Cortes-Zafra sa Mandaue City, Dr. Lorna Gonzales sa Balamban, Mark Andrew Jorolan sa Badian, Atty. Marvin Miralles sa Pinamungajan, Atty. Reinerio “RJ” Miranda Jr. sa Argao ug Elenito Palang sa Consolacion.