Deklarasyon ni Duterte gihangop sa mga relihiyoso

CEBU, Philippines — Gihangop sa chairman sa commission on the laity Fe Mantuhac-Barino ang pagdeklara ni Presidente Rodrigo Duterte sa Septiyembre 8 atol sa birthday sa mahal nga birhen nga usa ka national holiday.

Gipadayag ni Barino ang iyang kalipay sa maong deklarasyon ni Duterte tungod kay bisan sa kanunay niini nga pagbatikos sa simbahan aduna gihapon kini dako nga pagtuo sa mahal nga birhen.

Si Barino malaumon nga hikapon sa Ginoo ang kasingkasing ni Duterte pinaagi sa mahal nga birhen nga dili na niini batikoson ang simbahan lakip usab ang mga nangalagad sa simbahan.

Ang pamahayag ni Barino giluwatan atol sa pakighinabi niini sa Banat News subay sa kalihukan sa “Lihok Layko” nga gipahigayon diha sa Seminario Mayor de San Carlos.

Samtang si Jersen Jerome Paler, usa sa mga seminarista sa Seminario Mayor gikan sa Diocese of Maasin nitug-an nga dili siya makakwestiyon sa tumong sa presidente sa pagdeklarar niini ug holiday apan mapasalamaton siya niini.

Malaumon usab si Paler nga mag-abot ang pulong nga luwatan sa presidente ug ang binuhatan niini aron adunay kahiusahan. (/BDB)(BANATNEWS)