Landfill sa Carmen di na gyud mahinayon

CEBU, Philippines — Angay magmaya ang mga residente sa Lungsod sa Carmen nunot sa mando ni Gov. Gwendolyn Garcia pagpahunong sa kaugmaran sa Carmen Landfill Project nga gireklamo sa mga molupyo sa maong lungsod tungod sa kabalaka nga makaapektar kini sa ilang panglawas.

Matud pa ni Carmen Mayor Carlo Villamor, nakaginhawa og tarong ang mga taga Carmen pagkadungog sa kalamboan bahin sa gisaad ni Garcia niadtong panahon sa kampanya nga babagan niya Carmen Landfill project.

"Nagpasalamat mi ni Governor Gwen kay ni gawas man to sa media two weeks ago nga iya nang giturn-down ang landfill project sa Carmen. Ang mga tawo sa Carme, lipay kaayo nga dili na madayon ang project," matud ni Villamor.

Ang maong landfill maoy planong tambakan sa mga basura gikan sa mga kalungsoran sa amihanang Sugbo, apan ang mga residente sa Carmen  kusganong nibabag sa maong proyekto tungod kay nabalaka sila sa epekto niini sa kalikopan ug sa ilang panglawas.

Bisan gisugdan kining proyekto sa panahon ni kanhi Governor Hilario Davide III sa 2016  pinaagi sa gitaganang P5 milyones nga pundo para sa pagugmad niini, sa panahon pa ni Garcia sa dihang gobernador pa kini natawo ang maong plano.

Sa panahon kadto ni Gov. Garcia dihang napalit sa lalawigan ang maong luna aron tukoran sa maong landfill.

"I stated that during my campaign and I will fulfill it karon nga na gobernador ko balik. Dili gyud na nato ipadayon diha. Dili gyud na mahinayon and landfill diha sa Carmen," sumala pang Garcia sa interbyu kaniya.

Matud pa niya daghang mga taga Carmen ang niduol kaniya atol sa panahon sa kampanya aron ipahunong ang pagugmad sa maong landfill.

Gawas sa baho ug alisbo gikan sa basura, si Villamor miingon nga peligro sab kini sa panglawas sa mga taga Carmen ug pagkaguba sa kinaiyahan sa lungsod.

Naalarma ug nabalaka ang mga molupyo kaya ng 17-ektaryang luna diha sa Dawis Sur nga tukoran sa landfill duol kaayo sa Luyang Watershed diin magkuhaan og 35 milyones ka litrong tubig ang Metro Cebu Water District (MCWD) matag adlaw.

"Di ra man gud ang Carmen ang molabay. Apil pa ang mga nagkalain-laing municipalities ug apil pa ang mga siyudad. Bug-atan ang Carmen ato," dugang pa ni Villamor.

Wa pay nasayod kun asa na ilabay ang mga basura karong dili na mahinayon ang maong landfill.

"At the same time we were thinking sad asa ilabay ang basura. Kay ang basura problema man gud ni dili lang sa Carmen kung dili sa tanan gyud na municipalities sa Cebu," dugang pa sa mayor.(The Freeman/IBM)