Pagkasunog sa tunghaan tinuyo?

CEBU, Philippines — Gisusi karon sa kabumberohan Dakbayan sa Talisay ang taho nga tinuyo ang pagkasunog sa Talisay City National High School nga nahimutang sa Barangay Dumlog niadtong Lunes sa hapon.

Si SFO3 Rodulfo Luage, fire investigator sa Syudad nibutyag nga base sa nakuha nga kopya sa CCTV dunay mga tawo nga misulod sa tunghaan apan wala maklaro ang luyong bahin kun kinsa gyud ang nagdaob.

Usa ka babaye nga dili magpaila ang nitug-an sa Banat News nga gisugo siya sa usa ka maestra nga palimpyohan iyang lawak. Matud niini, duna kini nakit-ang mga batan-ong babaye ug lalaki nga nag-date sa lugar. Pagkataud-taod kalit nga nisilaob ang maong tunghaan.

Si Charles Enjambre nitug-an nga nakadungog sab siya og estorya nga gituyo og daob ang lugar kay kaniadto labayanan man kadto og basura.

Si Luage miingon nga paspas ang pagkatap sa sunog tungod sa mga plastic nga mga bangko nga gitapok sa dakong hawan sa luyong bahin sa tunghaan.

Hinuon si Geronimo Ygonia, principal sa Talisay City Central School miingon nga ila lang una nga gipasulod sa laing klase ang mga tinun-an samtang nanglimpyo pa sa lawak nga nangaguba ang mga bintana.

Giawhag ni Luage ang mga nakasaksi kun kinsa ang nagdaub sa pagbisita sa ilang buhatan aron makuhaan og pamahayag alang sa ipasakang kaso.

Ang Department of Education Region 7 nagpaabot pa sa incident report sa maong hitabo aron maoy ilang basehan sa paghatag og ayuda. (/IBM)(BANATNEWS)