Polis nihimakak nga sila ang nag–salvage sa notadong tulisan

CEBU, Philippines – Duha ka anggulo ang gitutokan karon sa kapulisan sa Syudad sa Talisay labot sa pagpatay sa lalaki ug gibitay sa taytayan sa Barangay San Isidro, Dakbayan sa Talisay niadtong Lunes sa kaadlawon.

Si Police Captain Nazarino Emia, deputy chief sa Talisay City Police Station nagkanayon nga base sa paagi sa pagpatay sa biktimang si Reynante Otero, 44, dako kaayo og kalagot ang naghimo niini kaniya.

Ang biktima napalgang nagbitay nga taytayan sa Mananga ug wala nay kinabuhi. Nasuta sa paghiling sa kapolisan nga duna kini samad pinusilan ug gituohang patay na kini sa dihang gibitay pinaagi sa paghikot og pisi sa liog niini. Si Otero naila nga notadong tulisan kinsa nadakpan na niadtong tuig 2017 didto sa Syudad sa Sugbo sa kaso nga pagpanulis. Ang mga silingan niini ug mismo si Kapitan Adelaida Restauro sa San Isidro niangkon nga dungog na ang biktima nga magpakaaron-ingnon nga habal-habal drayber unya tulison ang pasahero.

Si Otero sab nahimong subject sa buy-bust operation niadtong Abril 1 ning tuiga apan nakasibat lang sa dihang gihimo ang transaksyon.

Gihiktan ang duha ka kamot ug tiil sa biktima dayon gibitay. Aduna pay gipaskin nga karton sa iyang lawas nga adunay suwat nga “Ayaw ko sunda, tulisan ko.”

Matud pa ni Emia nga posible nga daghan ang naglagot sa biktima nga posibleng maoy nihimo sa krimen o ba kaha ang ka grupo niini sa iyang pagkatulisan o sa iyang pagkalambigit sa ginadiling drugas. Apan daghan sa nikomentaryo sa social media nga polis ang nihimo niini sa linuog nga pagpatay kang Otero, apan si Emia nihimakak sa pasangil. Siya niingon nga wala na sa ilang gipanumpaang propesyon nga mopatay. Sa nasayran, sunod-sunod nga tulis ang nahitabo sa miaging semana nga nakakuha sa atensyon ni Mayor Gerald Anthony “Samsam” Gullas Jr. ug miawhag sa kapolisan paghimo og kampanya nga mapakgang kini. (/IBM)(BANAT NEWS)