Pito ka gisuspensong opisyales sa Ermita balik trabaho na

CEBU, Philippines — Mobalik na sa ilang panerbisyo ang pito ka mga opisyal sa Barangay Ermita sa Dakbayan sa Sugbo sugod karong adlawa, Lunes, human sa usa ka tuig nga pagkasuspenso tungod sa giingong wala nila pagtabang sa kampanya batok illegal nga drugas diha sa ilang barangay niadtong tuig 2016.

 Ang kapitan sa Barangay Ermita nga si Mark Rizaldy Miral ug ang unom ka barangay konsehal nga sila Antonieto Flores, Ryan Jay Rosas, Alio Tamundo, Domingo Ando, Maria Buanghug ug Wilbert Flores mobalik sa opisina karon.

Nagpasalamat si Miral ni Councilwoman Efe Rupinta, anak nga babaye sa gipatay nga barangay kapitan nga si Felicisimo Rupinta, nga nangulo sa barangay sulod sa usa ka tuig sukad Hulyo 19, 2018 sa dihang gisuspenso ang pito sa walo ka mga opisyal sa barangay.

“Dako sab kaayo akong kalipay sa among pagbalik kay karon ang among mayor na gyud ang nilingkod. Pasalamat kaayo ko sa Kahitas-an nga gikan sa sinugdanan, gidungog niya ang akong pag-ampo,” matud ni Miral.

Kahinumduman nga ang mga opisyales sa Department of Interior and Local Government Cebu City Office nga gipangulohan ni acting Director Emma Joyevelyn Calvo giserve ang suspension order sa Office of the Ombudsman-Visayas.

Ang kanhi PDEA-7 Director Yogi Filemon Ruiz nagkanayon nga gipatuman ang search warrant batok kang Richard Cañete ug Josephine Cuyno, mga residente sa Barangay Ermita niadtong Nobiyembre 6, 2016.

Matud ni Ruiz nga walay usa sa mga opisyales sa barangay nga miabot sa crime scene aron pagsaksi sa search and inventory niadtong higayona.

Dayon gisang-at ni Ruiz ang reklamo batok sa mga opisyal nga sa wala madugay gisuspenso sulod sa unom ka bulan niadtong 2017.

Sa miaging tuig, gi serve sab ang usa ka tuig nga suspensiyon sa mga opisyales sa barangay sa Ermita alang sa pagtuman sa anti-graft office sa una niini nga paghukom nga ang mga opisyales sa barangay nagpasagad lang katungdanan dihang nagdumili sila sa pagtabang sa PDEA sa ilang operasyon sa barangay.

Si Miral nagkanayon nga adunay usa ka Balaan nga Misa sa alas-8 sa buntag sa barangay gym karong adlawa diin sundan sa kalihokan sa nutrisyon bulan sa barangay.

“Ang basic services, ato gyud ipadayon unya ang project for drainage sa sitio bato ato gyud i-push. Palig-onon ang peace and order kay naay ga report namalik ang mga hisnatcher diha sa Carbon,” matud niya.

Dihang gihangyo sa iyang pagtan-aw sa performance ni Efe, si Miral miingon nga ang pag-alagad sa barangay mao ang pinakamaayo ug labing dako nga kontribusyon ni Efe sa barangay.

Si Miral miingon nga dili sayon ang pag-alagad sa barangay ilabina nga si Efe bag-o sa politika.

Matud pa niya nga ang mga opisyales sa barangay magpadala og komunikasyon sa DILG-7 ug buhatan sa acting director sa DILG Cebu City, Atty. Ian Kenneth Lucero karong adlawa, aron ipahibalo nga humana ang usa ka tuig nila nga suspensyon. (/IBM)(BANATNEWS)