Anak sa kanhi kapitan sa Bohol gipusil patay
CEBU, Philippines — Patay ang usa ka 36-anyos nga tag-iya ug repair shop diha sa Espelita Street, Barangay Pahina San Nicolas, Dakbayan sa Sugbo human kini pusila sa wala mailhing mamumuno niadtong Biyernes sa gabii.
Ang biktima mao si Ninolito Abaño, minyo, nagpuyo sa maong lugar,
Base sa imbestigasyon sa kapolisan nga duha ka lalaki nga nagtaptap sa nawong ang niabot diha sa atubangan nga bahin sa shop ni Abaño ug sa walay daghang estorya gipusil nila ang biktima.
Ang kapolisan nagpahigayon og follow up nga imbestigasyon sa maong hitabo.
Gikataho nga si Albaño anak kini sa kanhi kapitan sa Barangay Jagoliao, Lungsod sa Getafe, Bohol nga si Alejandro Abaño kinsa gipatay usab niadtong Hunyo 28 niining tuiga samtang natulog sa ikaduhang andana sa ilang balay.
Si Kapitan Arnold Cambonga sa Pahina San Nicolas nitug-an nga tulo ka semana ang nakalabay gipusil usab si Abaño apan wala kini naigo.
Dugang ni Cambonga nga si Abaño nalakip usab kini sa listahan sa Barangay Anti-Drug Abuse Council (BADAC) nga giingong nalambigit sa ilegal nga drugas. (/BDB)(BANATNEWS)
- Latest