2 kilong shabu nasakmit

CEBU, Philippines — Duha ka kilong shabu nasakmit gikan sa 19 anyos nga lalaki atol sa buy-bust operation sa Barangay Cogon Ramos, Dakbayan sa Sugbo niadtong Biyernes sa gabii.

Ang dinakpan giila nga si Rico Rubi, residente sa dalan A. Lopez, Barangay Labangon, Dakbayan sa Sugbo.

Sa report sa kapolisan, napalitan sa poseur buyer si Rubi og usa ka kilong shabu hinungdan sa pagsikop kaniya ug sa dihang gihiling na kini laing usa ka kilong shabu ang napalgan sa posisyon sa maong suspetsado.

Tungod niini, si Cebu City Police Office Director Police Colonel Gemma Vinluan nagtuo siyang dunay shabu laboratory sa Sugbo kay bisan usa pa ka semana siya nilingkod dul-an sa P30 milyones na shabu ang nasakmit  sa kapolisan.

Apan butyag sa hepe sa PNP- Drug Enforcement Group Visayas (DEG), nga ang maong dinakpan maoy nagsilbing distributor sa drugas nga inangkat sa iyang amahan gikan pa sa Luzon.

Giingong ang amahan ni Rubi usa ka big time nga drug pusher nga naa karon sa bilanggoan.

Matud niya tulo ka buwan nilang gikuha ang pagsalig sa suspek hangtud nga nakadesider na silang sikupon na kini sa akto.

Sa ilang pagpaniid mga dagkong distributor sa illegal nga drugas ang mga kliyente ni Rubi diin dili momenos sa 500 ka gramo o tunga sa kilo nga shabu ang matag transaksyon. Adunay gipangbutyag si Rubi nga mga pangalan nga gisubay karon sa DEC-CV. Tungod sa kadaghan sa mga shabu nga nasakmit, si Vinluan wala mosalikway sa posibilidad nga adunay drug laboratory sa Sugbo.

Dili mominos P15 milyones nga balor sa shabu ang nasakmit niadtong Sabado sa gabii. Giawhag ni Vinluan ang publiko pag-report kun duna silay mamatikdang kadudahan ilabi sa mga bodega, apartments, condominiums ug mga hilit nga dapit.

Ang mga dinakpan mao ang subject sa operasyon mao si Alvin Cabañero, 45, kinsa igsuon ni konsehal Ican Cabañero ug giingong trabahante sa city hall sa dakbayan samtang ang iyang mga kaubanan mao sila si Joselito Salinas Tapic, 38 anyos ug si Joebert Villaro Cabriana, 31 anyos.

Si Police Captain Nazarino Emia, deputy chief sa Talisay City Police Station miingon nga 18 ka gagmay ug duha ka medium nga pakete sa ‘shabu’ ug halin ug buy-bust money ang nasakmit. (Rowena Capistrano, Gabriel Bonjoc ug reports nila ni Noreen Rose C. Vilchez, Jenny Luz Tejas /IBM)(BANATNEWS)