Karambola sa sakyanan, tulo patay
CEBU, Philippines — Tulo ang patay human nagkarambola ang tulo ka mga sakyanan ug usa ka motorsiklo diha sa General Maxilom Avenue sa Barangay Zapatera, Dakbayan sa Sugbo kagahapon sa kaadlawon.
Base sa imbestigasyon sa kapolisan, paingon sa uptown ang usa ka Toyota Fortuner nga gimaneho ni Angelo Rey Gurrea ,21, taga Dakbayan sa Talisay.
Giingong misuway kini og overtake sa gisundan niini nga Isuzu Crosswind Sportivo nga gimaneho sa usa ka John Dale Estano Alivia ,39, taga Barangay Pari-an, Dakbayan sa Sugbo.
Apan napunta sa kasugat nga lane si Gurrea atol sa pag-overtake apan nasugatan niini ang pasaheroang multicab nga gimaneho ni Raul Largado,46, taga Cordova.
Matud pa nga head-on nga nagkabangga ang duha ug tungod sa kakusog sa impact nahandos ang multicab og 23 ka metros.
Atol sa maong bangga, naapil pa og kaigo ang nagsunod sa jeep nga motorsiklo nga gimaneho ni Eman Berniel Balion, 25, taga Talamban, Dakbayan sa Sugbo. Hinuon luwas ra si Balion ug ang back rider niini nga si Grace Barela,22.
"Ni overtake si (Gurrea), unya na wrong lane, unya nag counterflow, nagsugat sila sa multicab nga naay kargang lima (dala sa driver), na drag pa 23 metros. Namatay dayon ang sa likod nga pasahero, ang sa front seat nalabay, (dayon) ang driver gigamitan pa og gabas kay naipit siya unya giputol-putol pa ni para makuha,"matud pa ni traffic investigation Police Chief Master Sergeant Antonio Jay Pizarras Jr. sa pakighinabi sa Banat News.
Si Carlo Gahator, 22, nga pasahero sab gideklara sab nga dead on the spot samtang padayon pang giila ang laing usa ka pasaherong nakalas. Bugtong ang usa ka pasahero nga giila nga si Michael Abella milagro nga naluwas.
Si Gurrea pasakaan og kasong reckless imprudence resulting to multiple homicides with multiple serious physical injuries and damage to properties. (/IBM)(BANATNEWS)
- Latest
