Habal-habal sa Talisay di lisud-lisuron

CEBU, Philippines – Wala gilisud-lisud sa mga sakop sa City of Talisay-Traffic Operation Development Authority (CT-TODA) ang mga habal-habal drivers sa dakbayan subay sa ilang istrikto nga pagpatuman sa lagda sa trapiko.

Matud ni Jonathan Tumulak, traffic czar sa siyudad, nga nakasabot sila sa panginabuhi sa habal-habal ingon man ang ka importante niini ilabi na sa kabukiran.

Apan si Tumulak nipasabot nga kinahanglan sab sila ma-regulate sama sa pagkuha og lisensya sa pagmaneho, pagsul-ob og helmet, pagrehistro sa motor ug limitahan ang pasahero.

Gani hinay-hinay man niya nga gipakigtagboan ang pipila ka habal-habal drivers sa urban areas ug isunod ang sa kabukiran.

Samtang si Tumulak nihangyo sa mga kapitan nga unta ilang organisahon ang habal-habal drivers sa ilang lugar aron sab mahatagan og sistema ingon man mailhan sila nga nagpuyo ra siya diha sa usa ka barangay.

Gawas niana, dali nalang sab mailhan ang mga dautang tawo nga magpakaron-ingnon nga habal-habal driver.

Usa sa laraw ni Tumulak nga mag-color coding na sila aron mas dali mailhan. (/GMR)(BANAT NEWS)