Mga pasahero natanggong gihapon; Paralitiko nalukot sa bawod
CEBU, Philippines – Nagpabilin pa nga natanggong sa mga port area sa Sugbo ang mga pasahero kinsa nagtinguha unta sa pagbiyahe kagahapon sa buntag tungod kay kanselado gihapon ang paglawig sa mga sakyanan sa kadagatan paingon ngadto sa laing lugar sama sa Dakbayan sa Tagbilaran sa Lalawigan sa Bohol. Naglakip sa nikanselar sa ilang mga biyahe mao ang M/V Ocean Jet 288 ug M/V Ocean Jet 168 nga gikatakda unta nga mobiya sa pantalan sa Dakbayan sa Sugbo alas 10:40 ug alas 11:40 kagahapon sa buntag.
Si Lieutenant Junior Grade Michael John Encina, tigpamaba sa Philippine Coast Guard sa Central Visayas nagkanayon nga gihimo ang pagkanselar sa biyahe sa mga shipping lines tungod sa nasinati nga dautang panahon.
Base sa weather bulletin nga giluwatan sa Philippine Atmospheric, Geophysical and Astronomical Services Administration (PAGASA) alas 11:00 sa buntag kagahapon maoy nasayran nga ang tropical storm Falcon ang nagpabilin pa gihapon.
Sa laing bahin, nalukot sa dagkong bawod ang usa ka paralitiko diha sa Larawan Beach sa Barangay Poblacion, Dakbayan sa Talisay niadtong Martes sa hapon. Ang biktima mao si Ronnie Ponce, hingkod ang panuigon, taga Barangay Ermita, Siyudad sa Sugbo.
Si Konsehal Jefferson Seguerra sa Barangay Poblacion nagkanayon nga nahibulong sila nga naabot ang biktima sa lugar nga mao lang usa.
Gikataho nga naghumolhumol sa iyang lawas ang biktima diha sa daplin sa dagat apan sa kakusog sa bawod nabanlas kini.
Ug maayo nalang gani kay adunay mga tawo nga daling nakatabang sa biktima. (Gabriel C. Bonjoc/BDB)(BANAT NEWS)
- Latest