Chiong abswelto sa kasong administratiba

CEBU, Philippines – Giabswelto si Mayor Valdemar Chiong sa Siyudad sa Naga sa kasong administratiba nga gipasaka batok kaniya. Ang Court of Appeals (CA) 20th Division nipakanaug sa desisyon niadtong Hulyo 5 sa pagbali sa gipakanaug nga desisyon sa Ombudsman.

Una niini, si Mayor Chiong gipasakaan og kaso sa Pryce Gas Inc. nga nialegar nga ang naulahi niisyu og conditional Mayor’s Permit sa kompetensiya niining kompaniya nga Petronas bisan pa man sa pakyas niini sa pagpakita sa ilang Fire Safety Inspection Certificate (FSIC).

Nipasabot ang CA nga gi-mislead sa nipasaka og kaso ni Chiong ang Ombudsman hinungdan nga nakapakanaug kini og desisyon kaniadto nga guilty si Chiong sa kasong grave misconduct ug neglect of duty. “From the foregoing, we find that Chiong could not be held liable of grave misconduct and neglect of duty or gross negligence since his guilt was never established through substantial evidence,” tipik sa desisyon sa CA.

Gikalipay ni Chiong ang maong desisyon ug iyang gipaabot nalang ang kriminal nga aspeto niini nga anaa pa sa Sandiganbayan. (/DILT)(BANAT NEWS)