1,000 na malapason nga drayber sa Talisay

CEBU, Philippines — Niabot sa kapin usa ka libo nga mga malapason nga drayber ang na-isyuhan og citation ticket sa pagsugod sa bag-ong administrasyon sa Siyudad sa Talisay.

Si Rogelio Villaver, operation chief sa City of Talisay-Traffic Operation Development Authority (CT-TODA), nibutyag nga sulod sa 15 ka adlaw labihan nang daghana sa mga na-isyuhan og citation ticket. Siya nagkanayon nga nagkalain-laing kalapasan ang ilang natala sa nagkadaiyang motorista.

Hinoon iyang giangkon nga mas nidaghan gyud ang nadakpan sa dihang gi-istrikto na gyud ang balaud sa kadalanan.

Una niini, si Mayor Gerald Anthony “Samsam” Gullas nitudlo ni Jonathan Tumulak isip traffic czar sa dakbayan aron makatabang sa suliran sa trapiko.

Si Gullas nihatag og pagtagad sa trapiko gumikan usab sa nagkagrabe nga gidaghanon sa mga sakyanan.

Ang no helmet policy ang gihingusgan ni Tumulak diin daghang motorista ang nadakpan ug nakamulta sa kantidad nga P500 nga nakadugang sa panudlanan sa siyudad.

Apan siya nipasabot nga dili ang makakwarta ang dakbayan ang ilang gihatagan og bili kun dili ang pagdisiplina sa katawhan. (BANAT NEWS)