Radaza nagpaugat sa City Hall
CEBU, Philippines — Magpabilin gihapon sa pag-okupar sa iyang buhatan sa Lapu-Lapu City Hall si Kongresista Paz Radaza hangtud nga si Department of Interior and Local Government Secretary Eduardo Año ang makaluwat na og tataw nga direktiba.
Nagpadala si Radaza og suwat ngadto sa buhatan ni Año ug gihatagan usab og kopya sa mao niyang suwat ang buhatan sa DILG sa dakbayan ingon man ang buhatan ni Mayor Junard “Ahong” Chan.
Gipasabot sa kongresista nga sukad nga nahimong lone congressional district ang dakbayan, ang district office anaa na sa City Hall diin anaa sab ang uban pang buhatan sa gobiyerno.
Gipahibalo sab ni Radaza si Año nga niadtong Hulyo 1 ang iyang buhatan gipugos sa pag-abli nga tataw sab nga nakalapas sa gisandigan niyang ordinansa nga nagtugot sa kagamhanan sa dakbayan sa paggamit sa maong lugar isip buhatan sa mapili nga kongresista.
Si Año sa sayo pa niila sa katungod ni Chan sa paghukom sa paggamit sa mga buhatan sa City Hall isip kabahin sa iyang gahum. (BANAT NEWS)
- Latest
