NBI-7 wala pa kadawat request ni Loot
CEBU, Philippines — Wala pay nadawat nga sulat ang National Bureau of Investigation (NBI) gikan kang retired general ug kanhi Daanbantayan Mayor Vicente Loot paghangyo sa maong buhatan nga mopahigayon og imbestigasyon kalabot sa bag-ong paglambigit kang Loot sa illegal drug trade.
Matud ni Atty. Tomas Enrile ang regional director sa NBI- Central Visayas nga wala pa siya nakadawat og formal nga suwat gikan kang Loot ug sa media ra usab siya nakabasa.
Si Enrile miingon nga kun makadawat sila sa formal request ila kining i-forward sa ulohang buhatan sa NBI.
“Ipo-forward namin muna ‘yan sa NBI Manila for authority to investigate kung ano ang advice ng NBI Manila,” matud ni Enrile.
Si Loot miinsister nga inosente siya sa mga pasangil ni Pres. Duterte nga siya drug protector ug niining bag-o subli siyang gidudahan nga nagpaluyo gihapon sa illegal drug trade dinhi sa Sugbo.
Tungod niini, gihangyo ni Loot ang NBI nga mohimo og imbestigasyon aron nga maestablisar ang kamatooran kalabot sa mga akusasyon batok kaniya sukad pa kaniadto hangtod karon.
Matud ni Loot nga kanunay lang siya subject og “vilification ug disinformation” nga bisan ang Presidente nitoo.
Si Loot nagkanayon nga andam siyang moatubang kun may kasong ipasaka batok kaniya kun tinuod pa kining mga pasangil. (BANAT NEWS)
- Latest
